Toshkentda 23 mingdan ortiq ishtirokchi qatnashgan VIII Xalqaro marafon bo‘lib o‘tdi
2026-yil 5-aprel kuni Toshkentda 23 ming nafar ishtirokchi qatnashgan VIII Xalqaro marafon bo‘lib o‘tdi. Ushbu musobaqa mamlakatdagi eng yirik sport tadbirlaridan biri bo‘lib, World Athletics Label maqomiga ega. Yugurish Humo Arena oldidagi maydondan boshlandi va minglab ishtirokchilar shu yerdan marraga yo‘l oldi.
Joriy yilda marafon dunyoning 30 dan ortiq mamlakatidan kelgan 23 mingdan ziyod ishtirokchini birlashtirib, o‘zining xalqaro nufuzini yana bir bor tasdiqladi. Ishtirokchilar 42,195 km, 21,097 km, 10 km va 5 km masofalarda, shuningdek bolalar yugurishlari hamda Nordic Walking yo‘nalishida bellashdi. Bu esa marafonni professional sportchilar, havaskorlar va oilaviy jamoalar uchun ham ochiq va qulay tadbirga aylantirdi.
Tadbir Prorun loyihasi tomonidan, O‘zbekiston Yengil atletika federatsiyasi, Toshkent shahar hokimligi, Sport vazirligi, Milliy olimpiya qo‘mitasi, Ichki ishlar vazirligi, Favqulodda vaziyatlar vazirligi, Milliy gvardiya, Mudofaa vazirligi, Maktabgacha va maktab ta’limi vazirligi hamda boshqa tashkilotlar ko‘magida tashkil etildi.
Bu yilgi marafonning asosiy g‘oyasi kosmos va yuksak maqsadlarga intilish mavzusi bilan bog‘liq bo‘ldi. Tadbir ramziyligi milliy ambitsiyalardan — 2028-yilda “Mirzo Ulug‘bek” nomli ilk o‘zbek sun’iy yo‘ldoshini uchirish rejalari hamda O‘zbekistonning ilk kosmonavtini parvozga tayyorlash istiqbollari bilan ilhomlangan. Ushbu obraz marafon ishtirokchilarini birlashtirib, oldinga harakat, texnologik rivojlanish va yangi marralarga intilish g‘oyasini aks ettirdi.
Bu yilgi marafon medali ham o‘ziga xos ramziy ma’noga ega bo‘ldi. Unda an’ana va kelajak uyg‘unligi ifodalangan: milliy ornament madaniy ildizlarni aks ettirsa, zamonaviy dizayn elementlari raqamlashtirish, ilm-fan, texnologiyalar va sun’iy intellekt rivojiga yo‘nalishni bildiradi. Shu bois medal nafaqat shaxsiy yutuq ramzi, balki O‘zbekistonning zamonaviy kelajagini barpo etishda ishtirok etish belgisi sifatida talqin qilinmoqda.
Bugungi kunda Toshkent marafoni bir martalik sport tadbiri sifatida emas, balki ommaviy sportni rivojlantirish va aholining sog‘lig‘ini mustahkamlashga qaratilgan izchil davlat siyosatining amaliy natijasi sifatida qaralmoqda. So‘nggi yillarda Prezident tashabbusi va doimiy qo‘llab-quvvatlovi bilan mamlakatda sport infratuzilmasi kengaytirilib, mahallalar va hududlarda musobaqalar soni oshirilmoqda, jismoniy faollik bilan muntazam shug‘ullanish uchun keng imkoniyatlar yaratilmoqda.
Natijada yugurish va marafon harakati barqaror, keng ko‘lamli va ijtimoiy ahamiyatga ega yo‘nalishga aylandi. Ayniqsa yoshlar, talabalar va oilalar orasida bu yo‘nalish tobora ommalashmoqda. Shu ma’noda Toshkent marafoni nafaqat yirik xalqaro sport musobaqasi, balki sog‘lom, faol va kelajakka intiluvchi jamiyatni shakllantirish yo‘lidagi amaliy qadam sifatida namoyon bo‘lmoqda.