Biometriya, antifrod va onlayn-do‘konlar hisobi: Senat raqamli islohotlarni ma’qulladi

Oliy Majlis Senati O‘zbekistonda raqamli muhitni modernizatsiya qilishga qaratilgan keng qamrovli qonunchilik o‘zgarishlarini ma’qulladi. Islohotlar bank sohasi, elektron tijorat va sug‘urta bozorini qamrab oldi.

Firibgarlikdan himoya

To‘lov tizimlari operatorlari va to‘lov tashkilotlari endilikda real vaqt rejimida shubhali operatsiyalarni aniqlab, bloklay oladigan antifrod tizimlarini joriy etishi shart bo‘ladi. Qo‘shimcha himoya vositasi sifatida biometrik identifikatsiya joriy qilinadi — bu bank kartalaridan pul o‘g‘irlanishi va ijtimoiy firibgarlik holatlarini sezilarli darajada kamaytirishi kutilmoqda.

Shu bilan birga, ma’muriy tartib-taomillar soddalashtirilmoqda: aksiyadorlik jamiyatlari va litsenziyalash to‘g‘risidagi qonunlarga kiritilgan o‘zgartirishlar kelishuv muddatlarini qisqartirib, banklar va fintex kompaniyalar rivojini tezlashtiradi.

Internet-savdoda tartib

Onlayn platformalar faoliyatini boshlash yoki to‘xtatish haqida vakolatli organni rasman xabardor qilishi shart bo‘ladi. Ushbu talabni bajarmaganlik uchun ma’muriy javobgarlik belgilanmoqda. Bu chora raqamli bozorda shaffoflikni oshirish va iste’molchilarni himoya qilishga qaratilgan.

Sug‘urta bozorida nazorat

Sug‘urta qonunchiligiga kiritilgan o‘zgartirishlar regulyatorning nazorat vakolatlarini kengaytiradi. Bozor ishtirokchilari yagona standartlar asosida ishlashi shart bo‘ladi, sug‘urta to‘lovlarini olishda iste’molchilar huquqlari esa qo‘shimcha kafolatlar bilan ta’minlanadi.

Ma’qullangan qonunlar prezident imzosiga yuborildi va rasmiy e’lon qilingach kuchga kiradi.