Samarqandga kirish YUNESKO forumi munosabati bilan ikki haftaga yopiladi

O‘zbekiston Ichki ishlar vazirligi Samarqandda harakat vaqtincha cheklanishini ma’lum qildi. Shahar kirish yo‘llari 30 oktabrdan 14 noyabrgacha YUNESKOning 43-Bosh konferensiyasi o‘tkazilishi munosabati bilan yopiladi.

Tranzit yo‘nalishida harakatlanayotgan transport vositalari uchun aylanma yo‘llar tashkil etiladi. Haydovchilarga QR-kodli flayerlar tarqatilib, ularda muqobil yo‘llar ko‘rsatilgan onlayn xaritalarga havolalar joylashtiriladi.

Ichki ishlar vazirligi aholiga va mehmonlarga ushbu sanalarda Samarqandga safarlarni imkon qadar keyinga surishni tavsiya qildi, bu yo‘l harakati tirbandliklarining oldini olishga yordam beradi.

YUNESKOning 43-Bosh konferensiyasi 1985 yildan beri ilk bor Parijdan tashqarida — tashkilot shtab-kvartirasidan boshqa joyda o‘tkaziladi. Tadbir Silk Road Samarkand turistik majmuasida bo‘lib o‘tadi.

Bosh konferensiya har ikki yilda bir marta o‘tkazilib, YUNESKOning strategiyasi, byudjeti va asosiy yo‘nalishlarini belgilaydi. Shuningdek, yig‘ilishlarda ijroiya kengash a’zolari saylanadi va tashkilot bosh direktori tasdiqlanadi.