Toshkentda uchta ko‘chada BRT yo‘laklari va Yunusobodda yangi tunnel paydo bo‘ladi

Toshkentda yo‘llardagi tirbandlikni kamaytirish ishlari davom etmoqda. Yangi rejalarga ko‘ra, tezkor avtobus transporti uchun ajratilgan BRT yo‘laklari poytaxtning yana uchta ko‘chasida — Shahrisabz ko‘chasi, Yangi Sergeli ko‘chasi va Amir Temur shohko‘chasida tashkil etiladi. Ushbu yo‘laklar jamoat transporti harakatini tezlashtirish va tirbandliklarni kamaytirishga xizmat qiladi.

Yunusobodda esa Amir Temur shohko‘chasining Yangishahar va Rixsiliy ko‘chalari bilan kesishgan qismida — tumandagi eng tirband chorrahalardan birida — yerosti avtomobil tunneli qurilishi rejalashtirilgan.

Loyihalarni amalga oshirish uchun Tashkent Invest texnik nazorat va muhandislik konsalting xizmatlari bo‘yicha xalqaro tanlov e’lon qildi. Unda mahalliy va xorijiy mutaxassislar qatnashishi mumkin. Arizalar 2-iyungacha qabul qilinadi.

Poytaxtdagi transport islohotlari bahs-munozaralarsiz kechmayapti. Avvalroq urbanistlar va ekspertlar tomonidan Buyuk ipak yo‘li metro bekati yaqinidagi transport tugunini qayta qurish loyihasi tanqid qilingan edi: BRT va tunnel bo‘yicha ma’qullangan yechimlar bilan bir qatorda, loyiha ikki qavatli avtomobil yo‘l o‘tkazgichini ham nazarda tutadi. Mutaxassislar bunday yechim xavfli ekanini, u tirbandliklarni qo‘shni chorrahalarga ko‘chirishi, piyodalar uchun qulaylikni yomonlashtirishi va shahar muhitiga salbiy ta’sir ko‘rsatishi mumkinligini ta’kidlashmoqda.