O‘zbekistonda daraxt kesish va noqonuniy qurilish holatlarini aniqlash uchun sun’iy yo‘ldosh ma’lumotlari tahlili joriy etiladi.

Prezident Shavkat Mirziyoyev yangi iqtisodiy imkoniyatlarni aniqlashda aerokosmik monitoringdan foydalanish bo‘yicha takliflar bilan tanishdi. 16 oktyabr kuni bo‘lib o‘tgan taqdimotda kosmik texnologiyalar iqtisodiyotni rag‘batlantirish vositasiga aylanishi kerakligi ta’kidlandi.

Yil boshidan buyon sun’iy yo‘ldosh suratlari yordamida 2 mingdan ortiq noqonuniy foydali qazilma qazib olish holatlari aniqlangan. Davlat xavfsizlik xizmati sun’iy yo‘ldosh ma’lumotlarini iqtisodiy jinoyatlarning oldini olish, yerlar, sanoat obyektlari va konlarni kuzatishda faol qo‘llashi topshirildi.

Shuningdek, asosan qishloq xo‘jaligi yerlarida 33 mingdan ortiq noqonuniy qurilish holati qayd etilgan. Shu munosabat bilan axborot platformalarini integratsiya qilish va bunday buzilishlarni tezkor aniqlash hamda bartaraf etish tizimini yaratish vazifasi qo‘yildi.

E’tibor markazida foydalanilmayotgan yerlarni xo‘jalik faoliyatiga jalb etish masalasi ham bo‘ldi. Hozirga qadar oltita hududda qariyb 300 gektar bo‘sh yer aniqlangan, shundan 95 gektari Toshkentda joylashgan. Ushbu yerlar auksionlarga chiqarilgan. Yil oxirigacha yana sakkizta hududda shunday tadqiqotlar yakunlanadi, kelgusi yilda esa bu jarayon barcha tuman markazlarida amalga oshiriladi.

Sun’iy yo‘ldosh ma’lumotlarini tahlil qilishda sun’iy intellektni joriy etish rejalashtirilgan. Uning yordamida daraxtlarning kesilishi, metan sizib chiqish holatlari, quyosh panellarining samaradorligi, yo‘l qoplamasi holati, shuningdek temir yo‘l va elektr tarmoqlaridagi nosozliklar kuzatib boriladi.

Bundan tashqari, kosmik sohada ta’lim ekotizimini yaratish, kosmik texnologiyalarni rivojlantirish va chekka hududlarda sun’iy yo‘ldosh aloqa tizimini kengaytirish masalalari muhokama qilindi. Prezident 2028 yilda Samarqandda o‘tkaziladigan Xalqaro astronautika kongressiga puxta tayyorgarlik ko‘rish bo‘yicha topshiriq berdi.