O‘zbekistonda tibbiyot va farmatsevtika sohalari uchun yagona agentlik tashkil etiladi, unga investitsiya fondi va “yagona darcha” tizimi ham biriktiriladi.

Prezident Shavkat Mirziyoyev farmatsevtika tarmog‘ini rivojlantirish agentligi vakolatlarini kengaytirish to‘g‘risida farmon imzoladi. 2026-yil sentyabrdan boshlab ushbu tuzilma Tibbiyot va farmatsevtika tarmoqlarini rivojlantirish agentligi deb qayta nomlanadi va butunlay yangi vazifalarni bajaradi.

Yangilangan idora nafaqat farmatsevtika, balki mamlakat sog‘liqni saqlash tizimini rivojlantirish uchun ham mas’ul bo‘ladi. Asosiy yo‘nalishlar qatorida xususiy klinikalarni qo‘llab-quvvatlash va ularni sog‘liqni saqlash tizimiga integratsiya qilish, zamonaviy texnologiyalarni joriy etish hamda mahalliy va xorijiy investitsiyalarni jalb etish bor. Investorlar uchun maslahat va hamrohlik xizmatlarini o‘z ichiga olgan “yagona darcha” tizimi yo‘lga qo‘yiladi.

Agentlik davlat tibbiyot muassasalarini xususiy boshqaruvga berish jarayonida ham ishtirok etadi hamda sog‘liqni saqlash tizimi uchun umumiy master-reja ishlab chiqadi. Davlat-xususiy sheriklik mexanizmlariga alohida e’tibor qaratiladi.

Islohot doirasida aksiyadorlik jamiyati shaklida Health Invest investitsiya kompaniyasi tashkil etiladi, shuningdek, agentlik huzurida tibbiyot tashkilotlarini rivojlantirish bo‘yicha maxsus fond ham tuziladi. Idora rahbari sog‘liqni saqlash vazirining birinchi o‘rinbosari darajasidagi vakolatlarga ega bo‘ladi. Agentlik direktori etib Abdulla Azizov tayinlandi.