Farg‘onada yuk mashinasi shinalariga yashirilgan qariyb 20 kg giyohvand modda aniqlandi

O‘zbekiston Davlat xavfsizlik xizmatining Chegara qo‘shinlari harbiy xizmatchilari Farg‘ona viloyatida yirik narkokontrabanda kanaliga chek qo‘ydi. Qo‘shni davlatdan kirib kelgan Volvo yuk avtomobili shinalari ichidan qariyb 20 kilogramm opiy va gashish topildi.

Huquq-tartibot organlari shubhali yuk mashinasini kuzatuvga olgan va Rishton tumanida yukni olish jarayonida gumonlanuvchilarni qo‘lga olgan. Ushlanganlar orasida 52 yoshli yuk mashinasi haydovchisi hamda buyurtmachi sifatida ko‘rilayotgan Uchko‘prik tumanining 26 yoshli fuqarosi bor. Keyinchalik buyurtmachining 46 yoshli otasi ham aniqlanib, sxemani tashkil etishda gumonlanib hibsga olingan.

Shinalardan 3,4 kilogramm opiy va 16,4 kilogrammdan ortiq gashish musodara qilindi. Taxminlarga ko‘ra, ushbu partiyaning qora bozordagi qiymati 300 mingdan 500 ming dollargacha baholanmoqda. Barcha moddalar ish bo‘yicha ashyoviy dalil sifatida rasmiylashtirilgan.

Uch nafar gumonlanuvchiga nisbatan kontrabanda va giyohvand moddalar noqonuniy aylanmasi bo‘yicha jinoyat ishi qo‘zg‘atildi. Ularga ehtiyot chorasi sifatida qamoqqa olish chorasi qo‘llangan. Hozirda tergov davom etmoqda, yetkazib berish kanalining barcha иштирокчилари aniqlanmoqda.