Andijonda ayol moddiy yordam puli yechib olinganidan so‘ng ijtimoiy xodimga hujum qildi

Andijonda ijtimoiy xizmat xodimiga hujum qilish bilan bog‘liq hodisa yuz berdi. Ayol bank uning kartasidan moddiy yordam pullarini kredit qarzini qoplash uchun yechib olganini bilganidan so‘ng, ijtimoiy xodimni keramika choynak bilan urgan.

Podrobno.uz agentligi ma’lumotlariga ko‘ra, hodisa 1-noyabr kuni mahallalardan biridagi fuqarolar yig‘ini binosida sodir bo‘lgan. Moddiy yordamning yechib olinishi ikki mahalla aholisi noroziligiga sabab bo‘lgan.

Jarohat olgan ayol “Inson” markazida ijtimoiy xodim bo‘lib ishlaydi. U yuz va qo‘l sohalaridan tan jarohati olgan. Sud-tibbiy ekspertizasi tayinlanib, tan jarohatlarining og‘irlik darajasi aniqlanmoqda.

Mazkur moddiy yordam aholiga elektr energiyasi to‘lovlarini qoplash uchun bir martalik to‘lov tarzida — 1 million so‘m miqdorida ajratiladi.

Milliy ijtimoiy himoya agentligi izoh berishicha, ijtimoiy to‘lovlar bank kartalariga tushganda, mavjud qarzdorlik bank tomonidan avtomatik tarzda ushlab qolinishi mumkin. Bunday hollarda fuqarolarga bankka murojaat qilish yoki masalani sud orqali hal etish tavsiya etiladi.

Avvalroq xabar berilganidek, O‘zbekistonda banklarga ijtimoiy nafaqa va davlat yordami mablag‘laridan qarzdorlikni undirib olishni taqiqlovchi qonuniy o‘zgartirishlar tayyorlanmoqda. Shuningdek, kredit tashkilotlari mijozlarga qarz olishdan oldin xavf-xatarlar bo‘yicha maxsus “risk ro‘yxati”ni taqdim etishga majbur bo‘ladi.