O‘zbekiston qishloq xo‘jaligi yerlariga xorijliklar kirishini cheklaydi — ustuvorlik mahalliy aholiga beriladi

O‘zbekiston qishloq xo‘jaligi yerlarini xorijiy investorlar uchun ajratish qoidalarini qayta ko‘rib chiqmoqda. Yangi yondashuvlar 21-aprel kuni Prezident Shavkat Mirziyoyevga taqdim etilib, uning tomonidan qo‘llab-quvvatlandi, deya ma’lum qildi Adliya vaziri Akbar Tashqulov.

Asosiy o‘zgarish shundan iboratki, xorijiy investorlar endi qishloq xo‘jaligi yerlarini to‘g‘ridan-to‘g‘ri auksion orqali olish huquqidan mahrum etiladi. Ular uchun faqat ikkilamchi ijara mexanizmi saqlanadi — viloyat hokimliklari huzuridagi direksiyalar orqali, kamida 10 million dollar investitsiya kiritish va foydalanilmayotgan, lalmi yoki yaylov yerlarni xo‘jalikka jalb etish sharti bilan. Auksionlar esa faqat mahalliy fermerlar va tadbirkorlar uchun ochiq bo‘ladi. Mudofaa, chegara hududlari, tarixiy-madaniy va o‘rmon yerlar esa faqat mamlakat fuqarolariga biriktiriladi.

Shu bilan birga, yirik investorlar uchun uzoq muddatli ishonchli kafolatlar ham taklif etilmoqda. Prezident qishloq xo‘jaligiga tegishli bo‘lmagan yerlarni ijaraga berish muddatini 25 yildan 49 yilgacha uzaytirishni ma’qulladi. Ushbu tartib xorijiy kapital ishtirokidagi sanoat va qurilish loyihalari uchun ham qo‘llanilishi rejalashtirilmoqda.

Parallel ravishda byurokratik to‘siqlarni kamaytirish ko‘zda tutilgan. Yer toifasini o‘zgartirish va kompensatsiya hisoblash jarayonlari to‘liq raqamlashtiriladi — inson omilisiz. Qishloq xo‘jaligi yerlarini ijara muddatini uzaytirish ham soddalashtiriladi: qishloq xo‘jaligi yerlari — 30 yilgacha, boshqa yerlar — 49 yilgacha elektron platformalar va davlat xizmatlari markazlari orqali.

Bundan tashqari, yana 100 ming gektar qishloq xo‘jaligi yerlarini 49 yil muddatga ijaraga berish, ekinlarni erkin tanlash huquqi bilan taqdim etish hamda sanoat plantatsiyalari uchun yerlarni sotish imkoniyatini kengaytirish rejalashtirilgan.