“Buyuk ipak yo‘li”dagi yo‘l o‘tkazgich bo‘yicha eshituvlar bahslarga sabab bo‘ldi

Toshkent hokimiyatida “Buyuk ipak yo‘li” metro bekati yonida BRT liniyasini uzaytirish va ikki darajali yo‘l o‘tkazgich qurilishi loyihasi bo‘yicha jamoatchilik muhokamasi o‘tkazildi. Biroq tadbir dastlab matbuot anjumani sifatida e’lon qilingani ishtirokchilar uchun kutilmagan hol bo‘ldi.

Loyihani hokimiyat, YHTM, “Tashkent Invest” kompaniyasi hamda Xitoyning China Construction vakillari taqdim etdi. U shaharning asosiy magistrallari orqali tezkor avtobus yo‘lagini rivojlantirish va eng tirband chorrahalardan birida yirik transport tugunini qurishni nazarda tutadi.

Loyihaning asosiy maqsadi — yo‘llarning o‘tkazuvchanligini oshirish va transport yuklamasini kamaytirish. Hisob-kitoblarga ko‘ra, ushbu hududda avtomobillar oqimi 100 foizdan ortiq oshishi mumkin, jumladan svetofor tartibga solinishidan voz kechish hisobiga.

Aynan shu yondashuv muhokama ishtirokchilarining bir qismi tomonidan tanqid qilindi. Mutaxassislar va aholi avtomobillarga ustuvorlik berish piyodalar uchun sharoitni yomonlashtirishi va zamonaviy shahar mobiliteti tamoyillariga mos kelmasligini ta’kidladi. Xususan, chorrahani kengaytirish va yerosti o‘tish yo‘laklarini saqlab qolish masalalari savollar uyg‘otdi.

Rasmiylar bildirilgan taklif va e’tirozlar inobatga olinib, loyiha takomillashtirilishini ma’lum qildi. Shu bilan birga, BRT tizimini rivojlantirish ustuvor yo‘nalish bo‘lib qolishi alohida qayd etildi. Tarmoq kengaytirilgach, yo‘nalishlar soni deyarli ikki barobar oshadi, kunlik yo‘lovchilar oqimi esa 310 ming nafargacha yetadi.

Kutilishicha, avtobuslar harakat tezligi 25 foizdan ortiq oshadi, yo‘lda o‘tadigan vaqt esa o‘rtacha 15 daqiqaga qisqaradi.

Loyiha doirasida infratuzilmani yangilash, qulay almashuv tugunlarini yaratish, shuningdek piyodalar va mikromobillik uchun sharoitlarni yaxshilash ham rejalashtirilgan.