Forbes ro‘yxatiga kiruvchi Saudiya xoldingi “Yangi Toshkent”da “Er-Riyod” kvartalini qurishi mumkin.

“Yangi Toshkent” qurilish direksiyasida Saudiya Arabistonining Sumou Holding Company korporatsiyasi top-menejmenti bilan muzokaralar o‘tkazildi. Uchrashuvning asosiy mavzusi zamonaviy turar-joy majmuasini barpo etish bo‘lib, u “Er-Riyod” kvartali deb nomlanishi mumkin.

Sumou Holding Forbes Middle East talqini bo‘yicha arab dunyosidagi eng yirik 100 kompaniya qatoriga kiradi. 2025-yilning o‘zida xolding Riyod, Dammam va Al-Xobar shaharlarida 800 ta turar-joy binosini qurish uchun umumiy qiymati 533 million dollarlik shartnomalar imzolagan. Saudiya tomoni faqat qurilish bilan cheklanmay, balki loyihalarni boshqarish, bozor tahlili va ko‘chmas mulkka to‘g‘ridan-to‘g‘ri investitsiya kiritishni ham o‘z ichiga olgan kompleks yondashuvni taklif etmoqda.

Kompaniya vakillari “kelajak shahri” loyihalari qurilish jarayoni bilan ham tanishdi. Tomonlar hozirda loyihaning texnik tafsilotlari va amalga oshirish bosqichlarini muhokama qilishni davom ettirmoqda.

Agar kelishuvga erishilsa, bu “Yangi Toshkent”ni rivojlantirishga yirik xalqaro quruvchilarni jalb etish va Saudiya Arabistoni bilan biznes aloqalarini mustahkamlash yo‘lida navbatdagi muhim qadam bo‘ladi.