O‘zbekistonliklarning kartalaridan endi mablag‘ to‘liq yechib olinmaydi: minimal qoldiq joriy etildi

15-apreldan boshlab O‘zbekiston banklari avtomatik yechib olish orqali bank kartalaridagi mablag‘ni to‘liq nolga tushira olmaydi. Uzcard to‘lov tizimi minimal kamaytirilmaydigan qoldiq joriy etilganini ma’lum qildi: endi kredit, bo‘lib to‘lash va mikroqarzlarni so‘ndirishda ham karta hisobida kamida uchta bazaviy hisoblash miqdori — 1 236 000 so‘m qolishi shart.

Akseptsiz yechib olish — bu har bir operatsiyani alohida tasdiqlamasdan avtomatik tarzda mablag‘ yechish bo‘lib, banklar uni mijozlarning moliyaviy majburiyatlarini qoplashda qo‘llaydi. Endilikda bunday operatsiyalar faqat belgilangan minimal qoldiqdan ortiq summa doirasida amalga oshiriladi.

Muhim jihat: ushbu cheklov mijoz kartaning rekvizitlarini o‘zi kiritib, to‘lovni bir martalik kod orqali tasdiqlagan holatlarga tatbiq etilmaydi — bunday vaziyatlarda mablag‘ to‘liq yechib olinishi mumkin.

Uzcard zarur texnik yangilanishlar banklar bilan hamkorlikda allaqachon joriy etilganini bildirdi. Yaqin vaqt ichida shunga o‘xshash yangilik Humo to‘lov tizimi tomonidan ham e’lon qilinishi kutilmoqda.