Janubiy Koreya ishtirokida Urganch aeroportini modernizatsiya qilish va boshqarish bo‘yicha kelishuv imzolandi.
15-oktabr kuni Toshkentda Uzbekistan Airports, Urganch xalqaro aeroporti va Janubiy Koreyaning Incheon International Airport Corporation kompaniyasi o‘rtasida davlat-xususiy sheriklik shartnomasi imzolandi. Hujjat Urganch aeroportini Build-Operate-Transfer (BOT) modeli asosida modernizatsiya qilish va boshqarishni nazarda tutadi.
Imzolash marosimida Uzbekistan Airports boshqaruvi raisi Javlonbek Umarxodjaev, Incheon International Airport Corporation prezidenti Li Hak Je, Urganch aeroporti direktori Oybek Matkarimov va O‘zbekiston transport vaziri Ilhom Maxkamov ishtirok etdi.
Shartnomaga ko‘ra, xususiy sherik yo‘lovchi va yuk terminalarini qurish va boshqarish, shu jumladan yer xizmatlarini ta’minlaydi. Davlat tomoni esa aerodrom kompleksini rivojlantirish — parvoz-qabul yo‘lagi va perronni nazorat qiladi.
“Janubiy koreyalik hamkorlar bilan hamkorlik O‘zbekiston aeroport infratuzilmasini rivojlantirishda yangi sahifa ochadi. Dunyoning eng yaxshi aeroportlaridan birini boshqarish bo‘yicha ularning tajribasi ilg‘or texnologiyalarni joriy qilish va yo‘lovchilar xizmatini yaxshilash imkonini beradi”, — dedi Javlonbek Umarxodjaev.
Loyiha qiymati 223 million dollar bo‘lib, 2027-yil oxirigacha yakunlanishi rejalashtirilgan. Shundan 115 million dollar Janubiy Koreya tomoni tomonidan investitsiya qilinadi. Kompaniya aeroportni 2047-yilgacha boshqaradi.
Rejada yangi parvoz-qabul yo‘lagi, yo‘lovchi va yuk terminalari qurilishi, Xalqaro fuqarolik aviatsiyasi tashkiloti (ICAO) standartlariga muvofiq zamonaviy svetosignal tizimlar o‘rnatilishi va maxsus texnika xarid qilinishi ko‘zda tutilgan. Yangi 39 ming kvadrat metr maydonli terminal soatiga 1300 yo‘lovchiga xizmat ko‘rsatadi.
Hamkor Incheon International Airport Corporation Osiyodagi eng yirik va eng texnologik rivojlangan transport tugunlaridan biri bo‘lib, yiliga 80 milliondan ortiq yo‘lovchiga xizmat qiladi.
Shuningdek, Incheon International Airport Corporation “Yangi Toshkent” xalqaro aeroportini qurish loyihasida Vision Invest (Saudiya Arabistoni) va Sojitz (Yaponiya) bilan hamkorlik qilmoqda.