"Xalq hammasini ko‘rib turibdi": Samarqand viloyati hokimi v.b. mansabdorlarni korrupsiyaga qarshi shaxsiy namuna orqali kurashishga chaqirdi

Samarqand viloyati hokimi vazifasini bajaruvchi Adiz Boboev barcha darajadagi rahbarlarni korrupsiyaga qarshi shaxsiy namuna orqali kurashishga chaqirdi. Bu haqda viloyat hokimligi matbuot xizmati xabar berdi.

Korrupsiyaga qarshi kurashish va davlat organlari ochiqligini mustahkamlash masalalariga bag‘ishlangan yig‘ilishda Boboev rahbarlarning xatti-harakati bevosita ularning tizimidagi muhitni belgilashini ta’kidladi.

“Qachon biz bu korrupsiyaga barham beramiz? Agar rahbar olayotgan bo‘lsa, xodim ham ‘nega men olmasligim kerak?’ deb o‘ylaydi. Shu tariqa illat yuqoridan pastga — viloyatdan mahallalargacha tushadi. Hammasi bizga bog‘liq”, — dedi u.

Viloyat hokimi xalq amaldorlarning harakatlarini ko‘rib turishini qayd etdi:

“Xalq hammasini biladi, hammasini ko‘radi. Kim qanday uy qurganini, kim qanday mashina olganini biladi. Shuning uchun har kim o‘zidan boshlashi, boshqalarga ibrat bo‘lishi kerak”, — dedi Boboev.

Yig‘ilish yakunida rahbarlarga jamoalarda va mahallalarda profilaktik ishlarni kuchaytirish, halol mehnat madaniyatini shakllantirish topshirig‘i berildi.

Korrupsiyaga qarshi kurash davlat siyosatining ustuvor yo‘nalishlaridan biri bo‘lib qolmoqda. Huquqni muhofaza qiluvchi organlar ma’lumotiga ko‘ra, 2024 yilda O‘zbekistonda korrupsiyaviy jinoyatlar uchun 7354 nafar shaxs jazoga tortilgan, bu o‘tgan yilga nisbatan 12,5 foizga ko‘p. Yetkazilgan zarar 2,8 trillion so‘mni tashkil etgan, eng ko‘p sudlanganlar Andijon viloyatida qayd etilgan.

Avvalroq prezident Shavkat Mirziyoyev korrupsiyaga qarshi kurashni amaldorlar orasida ortiqcha dabdaba va noo‘rin boylikni yo‘q qilishdan boshlash kerakligini ta’kidlagan edi.

Mamlakatda davlat xizmatchilari va ularning oila a’zolari daromad hamda mol-mulkni deklaratsiya qilish tizimini joriy etish ustida ham ishlar olib borilmoqda. Biroq 2022 yildan boshlab rejalashtirilgan bu jarayon hali to‘liq yakunlanmagan.