Toshkentdagi turistik ko‘chalar loyihalariga qo‘shimcha 1 trillion so‘m yo‘naltiriladi.

Toshkent hokimligi poytaxtdagi gastronomik va turistik ko‘chalarni obodonlashtirish uchun yana 1 trillion so‘m (82,1 million AQSh dollari) yo‘naltiradi. Bu haqda shahar hokimi Shavkat Umurzoqov “O‘zbekiston 24” telekanaliga bergan intervyusida ma’lum qildi.

Hokimning so‘zlariga ko‘ra, turistik ko‘chalar loyihalari aholining ijobiy munosabatiga sazovor bo‘lgan, shuning uchun ularning doirasi kengaytiriladi. 2026 yilda yana 24 kilometr hududni shunday formatda obodonlashtirish rejalashtirilgan.

Yangi loyihalar doirasida 30 mingtagacha ish o‘rni yaratilishi kutilmoqda.

“Prezident tarixiy farmon va qarorlarni imzoladi. Ular yangi imkoniyatlar eshigini ochadi. Bu o‘zgarishlarning samarasini har bir toshkentlik his qiladi — umuman olganda 100 mingdan ortiq ish o‘rni yaratiladi”, — dedi Shavkat Umurzoqov.

Prezident Shavkat Mirziyoyev 16 oktyabr kuni o‘tgan yig‘ilishda Toshkentdagi islohotlar qulay, zamonaviy va iqtisodiy jihatdan faol shahar muhitini yaratishga, tadbirkorlik va xizmat ko‘rsatish sohasini rivojlantirishga qaratilishi kerakligini ta’kidladi.

Poytaxtdagi yangi loyihalar

Yig‘ilish yakunida shuningdek, ajratilgan avtobus yo‘laklari (BRT) tizimi bo‘yicha loyihalarga aniqlik kiritildi. U 10 yo‘nalishni qamrab oladi, ularning aksariyati sobiq tramvay liniyalari bo‘ylab o‘tadi.

Avvalroq shaharga kirish postlarini ko‘chirish, transport almashish markazlarini tashkil etish hamda Yangi Sergeli va Katartal ko‘chalarini tunu kun faoliyat yuritadigan sayr zonalariga aylantirish rejalari haqida xabar berilgan edi.

Bozsu kanali bo‘ylab yangi piyodalar va dam olish hududini barpo etish ham mo‘ljallanmoqda.

Bugungi kunga kelib, Toshkentning turli tumanlarida bir nechta gastronomik va turistik ko‘chalar faoliyat yuritmoqda. Kelgusida ularning soni yanada ko‘paytirilib, tunu kun ishlaydigan muassasalar soni mingtagacha yetkazilishi rejalashtirilgan.