Qurilish vaziri: O‘zbekiston shaharlari aniq bosh rejalarga asoslanib rivojlanishi kerak

O‘zbekiston shaharlarining rivoji puxta ishlab chiqilgan bosh rejalar asosida olib borilishi, tartibsiz qurilishlarga yo‘l qo‘yilmasligi kerak. Bu haqda Qurilish va uy-joy kommunal xo‘jaligi vaziri Sherzod Xidoyatov 10 dekabr kuni Oliy Majlis Qonunchilik palatasida o‘tkazilgan “Hukumat soati”da ma’lum qildi.

Uning ta’kidlashicha, 2021–2025 yillarda mamlakatda qurilish sohasining texnik-me’yoriy bazasi keng ko‘lamda yangilandi. Mazkur davrda 650 ta me’yoriy hujjat qayta ko‘rib chiqilib, Yevropa Ittifoqi, Buyuk Britaniya, Xitoy, Janubiy Koreya, Rossiya va AQShning xalqaro standartlariga moslashtirildi. Ular qatoriga shaharsozlik me’yorlari, qurilish reglamentlari, texnik reglamentlar va standartlar kiradi.

Vazirning aytishicha, bosh rejalarni ishlab chiqish jarayonida hududlarni funksional zonalarga ajratish tizimi joriy etilgan. Mazkur yondashuv renovatsiya, rekonstruksiya va konservatsiya zonalarini belgilashni nazarda tutadi. Bu esa ruxsat etilgan faoliyat turlarini oldindan aniqlash va tarixiy-madaniy meros obyektlarini saqlab qolish imkonini beradi.

Hozirda barcha aholi punktlarini bosh rejalar bilan qamrab olish ishlari olib borilmoqda. Joriy yil yakuniga qadar 161 ta aholi punkti uchun shaharsozlik hujjatlarini tayyorlash yakunlanadi. Barcha hujjatlar raqamli formatda, hududlarning raqamli egizaklarini yaratgan holda ishlab chiqilmoqda.

Shaharsozlik axborot tizimi portalida allaqachon yuzlab loyihalar va sxemalar joylashtirilgan. Bu orqali aholi o‘z mahallalarining kelajakdagi rivojini, jumladan maktablar, bog‘lar va ijtimoiy infratuzilma obyektlarining joylashuvini 3D formatda ko‘rish imkoniga ega.

Sherzod Xidoyatov qurilish sohasidagi ma’muriy jarayonlar to‘liq raqamlashtirilganini ham ma’lum qildi. Barcha ruxsat berish tartiblari elektron platformalarga o‘tkazilgan bo‘lib, belgilangan muddatda asossiz rad javobi berilsa yoki javob bo‘lmasa, ruxsatnoma avtomatik tarzda berilgan hisoblanadi.

Toshkent shahrining 2045 yilgacha mo‘ljallangan bosh rejasi o‘tgan yil dekabr oyida hukumat tomonidan tasdiqlangan. Qurilish vazirligi ma’lumotlariga ko‘ra, jumladan baland qavatli loyihalar bo‘yicha qurilishga ruxsat berish qat’iy ravishda tasdiqlangan bosh reja va seysmik barqarorlik talablariga muvofiq amalga oshiriladi.