O‘zbekistonda inflyatsiya darajasi 7,8 foizgacha tushdi — bu so‘nggi to‘qqiz yildagi eng past ko‘rsatkichdir

O‘zbekistonda yillik inflyatsiya darajasi 7,8 foizgacha pasaydi — bu 2016-yil may oyidan beri kuzatilgan eng past ko‘rsatkichdir, deya xabar bermoqda Milliy statistika qo‘mitasi. Oktyabr oyida narxlar o‘sishi 0,6 foizni, yil boshidan esa 5,7 foizni tashkil etdi.

Taqqoslash uchun, 2024-yil oktabrida bu ko‘rsatkichlar yuqoriroq edi: oy davomida — 0,8 foiz, yil boshidan — 7,7 foiz, yillik hisobda esa — 10,2 foiz. Hozirgi inflyatsiya darajasi Markaziy bankning 2025-yil uchun 8 foizlik prognozidan past bo‘ldi.

Oziq-ovqat mahsulotlari o‘rtacha 0,9 foizga, nooziq-ovqat tovarlari 0,4 foizga, xizmatlar esa 0,3 foizga qimmatlashdi. Yillik hisobda esa oziq-ovqat 5,9 foizga, tovarlar 5,8 foizga, xizmatlar 14,4 foizga oshgan.

Eng sezilarli oylik o‘sish quyidagi mahsulotlarda qayd etildi:

• tuxum — +4,1%;

• mol go‘shti — +1,6–1,7%;

• sut — +1,2%;

• benzin — +1,5%.

Ayni paytda ayrim mahsulotlar arzonlashgan:

• shakar — 3,1%;

• guruch — 2,5%;

• parranda go‘shti — 1%.

Sabzavotlar orasida pomidor (+61%), bodring (+58%) va baqlajon (+11%) keskin qimmatlashgan, biroq karam (-5,4%), piyoz (-5,3%) va kartoshka (-2%) arzonlashgan.

Ba’zi hududlarda chiqindi tashish, isitish va issiq suv tariflari oshgan. O‘rtacha o‘sish mos ravishda 4,3%, 2,7% va 1,3%ni tashkil etdi.

Kommunal to‘lovlar yillik kesimda sezilarli oshgan:

• gaz — +39,2%;

• suv ta’minoti va kanalizatsiya — +35,1%;

• elektr energiyasi — +18,8%.

Yoqilg‘i va transport.
Benzin narxi oy davomida 1,5 foizga (yil davomida 11,7 foizga) oshdi. Propan 3,3 foizga, metan esa 0,1 foizga qimmatlashdi. Transport xizmatlari ham ko‘tarilgan:

• temiryo‘l — +2,5%;

• shahar avtobusi — +1,7%;

• shaharlararo avtobus — +1,1%.
  Aviabiletlar esa oy davomida 3,5 foizga arzonlashgan, biroq yillik hisobda 17,3 foizga oshgan.

Hududlar bo‘yicha.
Eng yuqori inflyatsiya Farg‘ona viloyatida (8,6%), Qoraqalpog‘istonda (8,2%) va Sirdaryo viloyatida (8%) qayd etildi. Toshkentda bu ko‘rsatkich 7,7 foizni tashkil etib, o‘rtacha respublika darajasiga yaqin bo‘ldi.

Mutaxassislar inflyatsiyaning pasayishini so‘m kursining mustahkamlanishi, oziq-ovqat ta’minotining barqarorlashuvi va ayrim tovar turlarida mavsumiy narx pasayishi bilan izohlamoqda.