Fuqarolar nomiga avtomobillar importi qisqartirilishi rejalashtirilmoqda

O‘zbekistonda jismoniy shaxslar nomiga rasmiylashtirilayotgan avtomobillar importi qisqartirilishi kutilmoqda. Bu choralar 10 dekabr kuni prezident tomonidan tasdiqlangan yashirin iqtisodiyotni qisqartirish bo‘yicha yangi dasturda belgilangan.

Hujjat import jarayonlari, bojxona nazorati va tovar aylanishida shaffoflikni oshirishga qaratilgan. Asosiy yo‘nalishlardan biri sifatida chegara postlarida notarif nazoratini soddalashtirish ko‘zda tutilgan. Mazkur yo‘nalish bo‘yicha loyiha 2026 yil 1 martga qadar ishlab chiqilishi rejalashtirilgan.

Dastur doirasida fuqarolar nomiga yengil avtomobil olib kirishni qisqartirish ham nazarda tutilgan. Bunga yuridik shaxslar uchun notarif talablarning soddalashtirilishi orqali erishiladi. Bu esa avtomobillarni jismoniy shaxslar emas, balki kompaniyalar orqali rasmiylashtirishni rag‘batlantirishi kerak. Mazkur masala bo‘yicha hukumat qarori 1 martga qadar qabul qilinishi kutilmoqda.

Bundan tashqari, 1 fevralga qadar Bojxona qo‘mitasi va UZIMEI markazi o‘rtasida mobil qurilmalarning IMEI-kodlarini ro‘yxatdan o‘tkazish jarayonini yanada shaffof qilish maqsadida integratsiya yo‘lga qo‘yiladi.

Bojxona qo‘mitasi ma’lumotlariga ko‘ra, 2025 yilning yanvar–noyabr oylarida yengil avtomobillar importi qiymati qariyb 14 foizga kamaygan — 1,23 milliard dollardan 1,06 milliard dollargacha. Shu bilan birga, import qilingan avtomobillar soni 4,5 foizga oshgan — 68,5 mingdan 71,7 mingtaga yetgan.

Avvalroq xabar berilishicha, 2026 yil 1 apreldan boshlab O‘zbekistonda ko‘chmas mulk va avtomobil xaridi bo‘yicha barcha operatsiyalar faqat bank kartalari yoki elektron to‘lov tizimlari orqali amalga oshiriladi. Shuningdek, 25 million so‘mdan yuqori to‘lovlar ham majburiy ravishda naqdsiz shaklga o‘tkaziladi.