Germaniya va Yaponiya o‘zbekistonlik mutaxassislarni kutmoqda: mamlakat mehnat migratsiyasini kengaytirmoqda

20-aprel kuni Prezident huzuridagi yig‘ilishda O‘zbekistondan mehnat migratsiyasini kengaytirish masalalari muhokama qilindi. Optimistik ko‘rsatkichlar mavjud: xorijiy ish beruvchilar allaqachon 100 mingdan ortiq mutaxassis uchun buyurtma bergan. Xususan, Germaniya 40 ming nafar hamshira, Yaponiya esa qurilish, logistika va xizmat ko‘rsatish sohalari uchun 15 ming xodimga ehtiyoj bildirmoqda. Hozirda O‘zbekistonning qariyb 1,2 million fuqarosi dunyoning 40 ga yaqin mamlakatida mehnat qilmoqda.

Asosiy ustuvor yo‘nalish — Yevropa va Sharqiy Osiyodagi yuqori daromadli mehnat bozorlariga chiqish. Bunda “kasb + til” tamoyili asosidagi qo‘shma ta’lim dasturlari muhim vosita bo‘ladi. Ayni paytda 12 ta loyiha doirasida 8500 nafar fuqaro tahsil olmoqda, ularning 3000 nafari allaqachon xorijda ish bilan ta’minlangan. Loyihalar sonini 20 taga yetkazish va qamrovni 10 ming nafargacha kengaytirish rejalashtirilgan.

Toshkentda 12 ta kasb va 7 ta xorijiy til bo‘yicha ta’lim beradigan, xalqaro imtihonlarni topshirish imkoniyati hamda 600 o‘rinli kampusga ega bo‘lgan maxsus tayyorlov markazi tashkil etiladi. Andijon, Samarqand, Farg‘ona va Toshkentdagi tibbiyot texnikumlarida hamshiralarning xalqaro attestatsiyadan o‘tishi uchun maxsus kurslar yo‘lga qo‘yiladi.

Davlat xorijda ishlash istagidagi fuqarolarni moliyaviy qo‘llab-quvvatlashni ham rejalashtirmoqda: xorijiy tillarni o‘rganish xarajatlarining 50 foizini qoplash, professional imtihonlar xarajatlarini to‘liq moliyalashtirish taklif etilmoqda. Mablag‘lar bevosita fuqarolarning o‘ziga beriladi. Shuningdek, har bir ishga joylashtirilgan mutaxassis uchun xorijiy ish beruvchilar va rekruting kompaniyalarini rag‘batlantirish tizimi joriy etilishi ko‘zda tutilgan.

“Xorijda ish” (xorijdaish.uz) platformasi sun’iy intellekt asosida yangilanadi, bu esa ish qidirish va ish beruvchilar bilan aloqani soddalashtiradi. Hududlarda yagona migratsiya markazlari va haydovchilikka o‘qitish xablari tashkil etiladi.

Ma’lumot uchun, 2025-yilda O‘zbekistonga yuborilgan pul o‘tkazmalari hajmi 18,9 mlrd dollarni tashkil etib, o‘tgan yilga nisbatan 27 foizga oshgan.