O‘zbekistonda ishbilarmonlik faolligi 20 foizga oshdi — yetakchilar Andijon va Surxondaryo

O‘zbekiston ishbilarmonlik faolligi indeksi (IFA) mart oyida 1 206 punktga yetdi — bu fevralga nisbatan 20,6 foizga, bir yil avvalgi ko‘rsatkichga nisbatan esa 22,7 foizga yuqori. Bu ma’lumotlar Iqtisodiy tadqiqotlar va islohotlar markazi tomonidan e’lon qilindi.

Birja va savdo

O‘sishning asosiy omili tovar-xomashyo birjasidagi faollik bo‘ldi: xomashyo xaridlari hajmi 46,2 foizga oshib, umumiy aylanma 7 460 mlrd so‘mni tashkil etdi. Ayniqsa, azot-fosfor o‘g‘itlari xaridi 93 barobar, armatura 6,5 barobar, qora metall prokati esa 4 barobar oshgani qayd etildi. Tuzilgan bitimlar soni ikki baravar ko‘paygan.

Banklar va hududlar

Banklararo to‘lov operatsiyalari soni 7 milliondan oshib, 4,3 foizga ko‘paydi. Ishbilarmonlik faolligi mamlakatning barcha hududlarida o‘sish qayd etdi. Eng yuqori ko‘rsatkichlar Andijon viloyati (+47,8%) va Surxondaryo viloyatiga (+43,7%) to‘g‘ri keldi.

Biznes muhiti

Amaldagi korxonalar soni 2 557 taga oshib, 511 mingga yetdi. Yirik biznes 558 ta kompaniyaga ko‘payib, 4 719 taga yetdi. Kichik korxonalar soni 2 200 taga oshdi. Faqat savdo belgilarini ro‘yxatdan o‘tkazish (-8,1%) va fermer xo‘jaliklari sonida biroz pasayish kuzatildi.

Eslatib o‘tamiz, Jahon banki Yevropa va Markaziy Osiyo bo‘yicha so‘nggi hisobotida O‘zbekistonning yaqin yillardagi iqtisodiy rivojlanish prognozlarini sezilarli darajada yaxshilagan edi.