Buxoroda Hindistonlik tibbiyot talabasi vafot etdi.

28 fevral kuni Buxoro Davlat Tibbiyot Institutida Hindistonlik talaba vafot etdi, deb xabar beradi universitet matbuot xizmati.

Hodisa soat 09:00 atrofida talabaning turar joyida yuz berdi: ikkinchi kurs talabasi o‘zini yomon his qildi va tana harorati ko‘tarildi. Xonadoshining so‘zlariga ko‘ra, u “Paratsetamol” ichgan, lekin harorati tushmagan. Talaba viloyat yuqumli kasalliklar shifoxonasiga olib borilgan, ammo tibbiy yordam ko‘rsatilishiga qaramay vafot etgan.

Universitet rahbariyati voqea haqida Hindiston elchixonasi va talabaning yaqinlariga xabar bergan.

Viloyat RNIChning dastlabki tashxisiga ko‘ra, o‘lim o‘tkir nafas yetishmovchiligi natijasida, ikkala o‘pka to‘liq pnevmoniyasi tufayli sodir bo‘lgan. Ma’lum qilinishicha, talaba a’lochi bo‘lgan va hech kim bilan janjallashmagan. Hodisa bo‘yicha tergov olib borilmoqda.

Shuni eslatib o‘tamizki, Xorazmda ham pnevmoniya tufayli 20 yoshli Toshkent Tibbiyot Akademiyasi talabasi vafot etgan edi. U taxminan bir hafta oldin kasal bo‘lgan va uyida vafot etgan.