Uzbekistan Airways 14 ta Boeing 787−9 Dreamliner samolyotini xarid qilmoqda va yana 8 tasini opsion asosida oladi.

“Uzbekistan Airways” o‘z tarixidagi eng yirik shartnomani imzoladi — kompaniya Boeing bilan 14 ta keng fyuzelyajli Boeing 787−9 Dreamliner samolyotlarini yetkazib berish va yana 8 ta havo kemasini opsion asosida xarid qilish bo‘yicha kelishuvga erishdi. Yetkazib berish 2031-yildan boshlanadi.

Aviakompaniya matbuot xizmati ta’kidlaganidek, mazkur kelishuv parkni modernizatsiya qilish va uzoq masofali parvoz imkoniyatlarini kengaytirishga qaratilgan uzoq muddatli dastur doirasida amalga oshirilmoqda.

Uzbekistan Airways 2016-yildan buyon Boeing 787−8 samolyotlaridan foydalanib kelmoqda va bu turdagi layner bilan ishlayotgan Markaziy Osiyodagi yagona aviakompaniya bo‘lib qolmoqda. Yangi model — 787−9 — yo‘lovchi sig‘imi va parvoz masofasi kengaytirilgani bilan ajralib turadi, bu esa kompaniyaga yangi yo‘nalishlarni ochish va reyslar sonini ko‘paytirish imkonini beradi.

Shartnoma, shuningdek, “O‘zbekiston-2030” dasturiga mos keladi va Toshkentni mintaqaning yetakchi tranzit markaziga aylantirish bo‘yicha aviakompaniyaning strategik maqsadini qo‘llab-quvvatlaydi.

“Uzbekistan Airways” boshqaruv raisi Shuhrat Xudayqulovning so‘zlariga ko‘ra, yangi shartnoma kompaniyaning Markaziy Osiyodagi yetakchi tashuvchi sifatidagi mavqeini yanada mustahkamlaydi hamda yo‘lovchilarga qit’alararo parvozlar uchun kengroq imkoniyatlar yaratadi.