O‘zbekiston madaniyat vaziri yana reklama roligida suratga tushdi

O‘zbekiston madaniyat vaziri Ozodbek Nazarbekov yana reklama roligida paydo bo‘ldi. Bu safar u Qo‘qon universitetining Andijon filialini reklama qilgan videoda suratga tushgan. Video 4 iyul kuni e’lon qilindi.

«Universitetga qabul jarayoni davom etmoqda, men esa shu imkoniyatdan foydalanib, yoshlarimizga ushbu oliygohda o‘qishni tavsiya qilaman», — dedi Nazarbekov murojaatida.

Bu madaniyat vazirining reklama kampaniyalarida qatnashgan ilk holati emas. Avvalroq u erkaklar kiyimlari do‘koni Kingsman reklamasida suratga tushgan edi. O‘shanda Raqobatni rivojlantirish va iste’molchilar huquqlarini himoya qilish qo‘mitasi kompaniyani qonunbuzarlikda aybli deb topib, jarimaga tortgan. Nazarbekov esa reklama beruvchi yoki tarqatuvchi emasligi sababli aybsiz deb hisoblangan.

«Reklama to‘g‘risida»gi Qonunning 16-moddasiga ko‘ra, tovar yoki xizmatlarni davlat organlari yoki ularning mansabdor shaxslari tomonidan ma’qullangani haqida ko‘rsatish taqiqlanadi.