O‘zbekiston va Ukraina muloqotni chuqurlashtirish va hamkorlikni kengaytirishga kelishib oldi

Nyu-Yorkda, BMT Bosh Assambleyasi doirasida O‘zbekiston tashqi ishlar vaziri Baxtiyor Saidov va Ukraina tashqi ishlar vaziri Andrey Sibiga uchrashuvi bo‘lib o‘tdi.

Tomonlar savdo, investitsiya, ta’lim va madaniy almashinuv sohalarida hamkorlikni rivojlantirish, shuningdek, xalqaro tashkilotlar doirasidagi hamkorlik masalalarini muhokama qildilar.

«Uchrashuv O‘zbekiston va Ukrainani muloqotni chuqurlashtirish, hamkorlikni mustahkamlash va xalqlarimiz farovonligi yo‘lida yangi imkoniyatlarni rivojlantirishga bo‘lgan o‘zaro sadoqatini tasdiqladi», — dedi Saidov.

Sibigaga ko‘ra, tomonlar siyosiy muloqotni qayta yo‘lga qo‘yish va hamkorlikni ikki tomonlama hamda ko‘p tomonlama formatlarda kengaytirishga kelishib oldilar.

Davlat statistika qo‘mitasi ma’lumotlariga ko‘ra, bir necha yillik tovar ayirboshlash hajmi pasayishidan so‘ng, 2025-yilning birinchi yarmida u 50 foizga oshib, 151,8 mln dollarga yetdi. Taqqoslash uchun, 2024-yilning shu davrida bu ko‘rsatkich 101,5 mln dollarni tashkil etgandi.